Viloyat, shahar, tuman hokimliklarining yuridik xizmati

• Viloyat, shahar va tuman hokimliklarida huquqiy ishlarni amalga oshirish uchun yuridik xizmat tashkil qilinadi. Viloyatlar va Toshkent shahar hokimliklarida ilgari huquqiy ishlarni olib borish Huquqni muhofaza qiluvchi organlar, harbiy safarbarlik va favqulodda vaziyatlar masalalari bo`yicha guruh zimmasiga yuklatilgan edi. Viloyat hokimliklarida boshqaruv apparati tashkiliy tuzilmalarining faoliyatini takomillashtirish hamda ularga yuklangan funksiyalarning bajarilishi uchun zarur shart-sharoitlarni ta`minlash maqsadida O`zbekiston Respublikasi Vazirlar Mahkamasining 2004 yil 5 yanvardagi “Davlat boshqaruvi hududiy organlari tuzilmasini takomillashtirish to`g`risida”gi Qarori hamda O`zbekiston Respublikasi Prezidentining 2005 yil 10 avgustdagi “Toshkent shahar hokimligi boshqaruv apparati tuzilmasini tasdiqlash to`g`risida”gi Qarori bilan viloyat va Toshkent shahar hokimliklarida yuridik xizmatni Huquqni muhofaza qiluvchi organlar, harbiy safarbarlik va favqulodda vaziyatlar masalalari bo`yicha guruh emas, balki hokimlik boshqaruv apparatining tuzilmasida nazarda tutilgan yuriskonsult bajarishligi belgilab qo`yildi. Bundan tashqari ushbu qarorga muvofiq hokimlik boshqaruv apparatidagi yuriskonsult o`z funksiyalarini bajarishda faqat bevosita hokimga bo`ysunishi qat`iy belgilab qo`yildi.

• Mahalliy davlat hokimiyati organlari yuridik xizmatining faoliyati asosan normativ-huquqiy hujjatlarni qabul qilishda qonuniylikni ta`minlash, shartnomaviy munosabatlarni tartibga solish hamda mahalliy davlat hokimiyati organlarining huquq va qonuniy manfaatlarini sudda va boshqa organlarda himoya qilishga qaratilgan. • O`zbekiston Respublikasi Vazirlar Mahkamasining 1998 yil 24 apreldagi 177-sonli Qarori bilan mahalliy hokimiyat organlarining ishini huquqiy ta`minlash maqsadida tuman va shahar hokimliklari apparati tuzilmasida yurist lavozimi joriy etildi.