Samarqandni egallash arablarning asosiy maqsadiga aylanadi. 712-yili Qutayba Xorazmdan qaytadi. Arablar Xorazmshohdan o‘lja olingan o‘n ming bosh qoramolni qo‘shin ketidan haydab kelardilar. Dastlab ular o‘lja bilan Marvga yo‘l olmoqchi bo‘ladilar. Ammo Qutayba kutilmaganda Samarqandga qarab yuradi. SA MARQA ND MUDOFA A SI

Buxorxudot va Xorazmshoh bilan sulh shartnomasi tuzilgan bo‘lib, bu yurishda ularning qo‘shinlari Qutaybani kuzatib borishardi. Bu paytda Gurak Samarqand hukmdori edi. U Samarqand mudofaasini tashkil qiladi. Shaharga kiraverishda So‘g‘d chavandozlari arablar ustiga selday yopiriladilar. Shafqatsiz jang boshlanadi. Gurak lashkarlari dushman bilan mardonavor jang qiladilar va arablarga katta talofat yetkazadilar. Ammo shu bilan birga ko‘plab So‘g‘d piyodalari va otliqlari ham halok bo‘ladilar. Gurak shaharga chekinishga majbur bo‘ladi.

Samarqand qamali boshlanadi. Arablar devordan tuynuk ochish maqsadida shahar devorlari qarshisiga 300 ta devorbuzar moslama manjaniq o‘rnatadilar. Shahar himoyachilari qahramonlarcha mudofaada turadilar. Shu paytda turk hoqoni qamaldagi samarqandliklarga yordam berish uchun otliq qo‘shin yuboradi

Ammo Samarqandga kelayotgan otliq qo‘shin pistirmaga yo‘liqadi va arablar tomonidan qirib tashlanadi. Samarqand himoyachilari shaharni bir oydan ortiq himoya qiladilar. Ular katta talofat beradilar. Oziq-ovqat va suv zaxiralarning oxiri ko‘rinib qoladi. Shahar taslim bo‘ladi. Gurak arablar bilan sulh tuzishga hamda ularga katta tovon to‘lashga majbur bo‘ladi.