MA’RUZA: TEXNIK IJODKORLIK JARAYONIDA AXBOROT TEXNOLOGIYALARIDAN FOYDALANISH R Е J А : 1. Texnik ijodkorlik jarayonida axborot texnologiyalaridan foydalanish 2. Ijodkorlik faoliyatini tashkil etishda kompyuterlar afzalligi

Texnik ijodkorlik jarayonida axborot texnologiyalaridan foydalanish. Bizning asrimiz fan-texnika yutuqlarining mislsiz darajada taraqqiy etishi, hamda bu taraqqiyot natijalarining oddiy insonlar hayotiga juda qisqa muddatlarda keng kirib kelayotganligi bilan tavsiflanadi. Mana shunday taraqqiyot omillaridan biri bu shubhasiz yangi axborot texnologiyalaridir. Bugungi kunda hayotimizning hyech bir sohasini, jumladan ta’lim tizimini ham yangi axborot texnologiyalari hamda uning asosi bo’lgan kompyuterlarsiz tasavvur etib bo’lmaydi. Axborotlarni qabul qilish, qayta ishlash va yangi axborotni yaratish bilan shug’ullanuvchi texnologiyalarni kompyuterlar asosida joriy etish, ya’ni belgilangan faoliyat turini amalga oshiruvchi kompyuter va unda joriy etilgan dasturiy ta’minotni yuritish majmuasi axborot texnologiyasi deb yuritiladi. Axborotlar davri hisoblangan bugungi kunda tarixda birinchi marotaba insoniyat faoliyatining ko’plab sohalari moddiy buyumlar bilan emas, balki axborotlarni qayta ishlash bilan bog’liq bo’lmoqda. Shu sababli, bugungi kunda yoshlarni axborot davrida yashash va ishlashga o’rgatish, ularda axborotlarni yig’ish, tartibga solish va tahlil qilish, uni uzatish ko’nikmalarini shakllantirish muhim ahamiyat kasb etadi. Bular o’z navbatida talabalarning ko’plab qobiliyatlarini, shu jumladan, ixtirochilik qobiliyatlarini rivojlantirishda ham muhim asos vazifasini o’taydi, chunki har qanday yangi g’oyani taklif qilishdan ilgari qaralayotgan sohani batafsil o’rganib chiqish, yangi axborotlarni topish va uni tavsiya etilayotgan yechim bilan bog’lashni o’rganish lozim bo’ladi. Bu vazifalarni amalga oshirish uchun bo’lsa, albatta oddiy inson xotirasida saqlab bo’lmaydigan darajada katta hajmdagi axborotlarni qayta ishlash talab etiladi. Yangi axborot texnologiyasi imkoniyatlari ushbu muammoni avtomatlashgan o’quv-axborot tizimlari, bilimlar banki va ma’lumotlar banklari vositasida oson va samarali hal qilish imkoniyatlarini yaratadi. Shu munosabat bilan keyingi paytda respublikamizda bu sohaga e’tibor kuchayib bormoqda, keyingi besh yil mobaynida mavjud kompyuterlar parki bo’yicha vatanimiz jahon ko’rsatkichlariga yaqinlashib qoldi. Biroq, ta’lim jarayonida zamonaviy axborot texnikalarini, jumladan shaxsiy kompyuterlarning qo’llanishi uchun zarur nazariy

va amaliy, ilmiy-metodik asoslarning ishlab chiqilmaganligi ayniqsa ijodiy qobiliyatlarni rivojlantirish bilan bog’liq qator muammolarni keltirib chiqarmoqda. Hozirgi paytda o’quv dasturlariga xalq xo’jaligida yangi axborot texnologiyalari va kompyuter texnikalarining qo’llanilish sohalari bilan tanishtiruvchi ko’plab fanlar kiritilgan. Ularni o’zlashtirish davomida talabalar kompyuterlarning ta’lim, iqtisod va muhandislik ishlarida qo’llanilishi, matematik modellashtirish, avtomatlashgan o’quv-axborot tizimlari hamda ish o’rinlarida foydalanish tartibi, mehnat tavsifi va unumdorligini oshirishdagi ahamiyati bilan tanishadilar. Bunda talabalar mehnat va kasb ta’limi o’qituvchisi faoliyatida kompyuterlarni qo’llash tartibini ma’lum ma’noda o’zlashtirsalarda, uni bugungi kun talabi darajasida deb bo’lmaydi, zero u "Kadrlar tayyorlash milliy dasturi"da belgilab berilgan vazifalarni amalga oshirish uchun yetarli emas. Demak, talabalarni yangi axborot texnologiyalari bilan ishlash bilim va ko’nikmalarini jahon talablari darajasiga ko’tarish uchun o’quv dasturidagi fanlar bilan birgalikda oliy o’quv yurtlaridagi barcha ta’lim shakllari, jumladan talabalar konstruktorlik byurolaridan ham samarali foydalanish kerak. Bu o’rinda hal etilishi lozim bo’lgan asosiy vazifa yangi axborot texnologiyalarini ta’lim jarayonida qo’llashning didaktik imkoniyat va shakllarini aniqlab olishdan iborat. Ixtirochilik ijodkorligini amalga oshirishda kompyuterlarni qo’llashning shakl va usullarini belgilashda, avvalo ular yordamida talabaning ixtiro qilishni emas, balki yangi texnik yechimni yaratishdagi axborotlarga bo’lgan ehtiyojini qondirishi va uni amalga oshirishning samarali yo’llarini ishlab chiqishda foydalanishini e’tiborga olish lozim. Bundan kelib chiqqan holda ixtirochilik ijodkorligini takomillashtirishdagi vazifalar tahlili asosida, bu jarayonda kompyuterlarni qo’llashning quyidagi asosiy yo’nalishlarga amal qilinadi: 1. Ta’lim jarayonining aniq masalalarini hal qilishga yordam beruvchi didaktik vosita sifatida. 2. Talabalar ilmiy-texnika ijodkorligining axborot bilan ta’minlanganlik darajasini oshirishga xizmat qiluvchi didaktik vosita sifatida.

3. O’qituvchilarni tayyorlashda politexnik yo’nalishni amalga oshirishni ta’minlovchi vosita sifatida. Ixtirochilik ijodkorligini shakllantirishning asosi sifatida kompyuterlar vositasida amalga oshiriladigan dasturlashtirilgan ta’lim metodidan foydalandik. Bunga ko’ra talabalar ixtirochilik ijodkorligiga oid bilimlarini kompyuter axborot kadrlari orqali o’rganadilar va operao’ion kadrlar vositasida sinab ko’radilar. Dasturlashtirilgan ta’limni amalga oshirishda kompyuterlardan foydalanishning yana bir afzalligi test savoliga noto’g’ri javob berilgan holda, talabada ishlab chiqilgan bilimlar bankidan qo’shimcha ma’lumotlar olib vazifani bajarishga qayta kirishish imkoniyatining mavjudligidir. Bundan tashqari, displeyda shaklni chizishni mustaqil bajarish talabaning chizmachilik elementlari, masshtab, o’lcham, koordinata to’g’risidagi tushunchalarni mukammal o’zlashtirishiga xizmat qiladi. Ixtirochilik ijodkorligini amalga oshirishdagi asosiy vazifalardan biri axborotlarni topish va qayta ishlash bilan bog’liq bo’lganligi sababli kompyuterlarning axborot bilan ta’minlovchi didaktik vosita sifatida qo’llanilishi alohida dolzarblik kasb etadi. Ma’lumki, kompyuterlar axborotlarni yig’uvchi, saqlovchi va uzatuvchi qurilma sifatida ishlaydi. Ma’lumotlar talab darajasida qayta ishlanib, hajm jihatidan qanchalik keng, aniq, asosli va foydalanish uchun qulay shaklga keltirilsa, ilmiy imkoniyatlardan foydalanish samaradorligi va erishiladigan ijodiy yutuqlar soni ham ortib boradi. Bu boradagi kompyuterlar imkoniyatlaridan to’laroq foydalanish maqsadida talabalar ixtirochilik ijodkorligini amalga oshirishning avtomatlashtirilgan o’quv-axborot tizimini ishlab chiqdik va joriy qildik.. Mehnat va kasb ta’limi o’qituvchilarini tayyorlashning politexnik yo’nalishini ta’minlashda kompyuterlarni qo’llashning imkoniyatlari uning ta’lim sifatini oshirishga xizmat qiluvchi didaktik vosita bo’lishi bilan birga, talabalarda ushbu texnika imkoniyatlari to’g’risidagi tushuncha-larning tegishli masalalarni yechish jarayonida hosil qilinishi bilan ham belgilanadi.

Ushbu qarab chiqilgan yo’nalishlar mazmunidan kelib chiqqan xolda kompyuterlardan foydalanish tartibini o’rgatuvchi, ko’nikma hosil qiluvchi va nazorat qiluvchi vazifani bajarishidan iborat deb belgiladik. O’rgatuvchi tartibda ishlashda kompyuter o’rgatuvchi dastur yordamida talabaning egallagan bilim darajasiga mos holda yangi bilimlarni egallashiga xizmat qiladi. Ko’nikma hosil qilish tartibida ishlashda kompyuter chizmalarni bajarish, ixtiro texnik yechimini tavsiflovchi buyumni yasashning texnologik hujjatlarni ishlab chiqishni yengillashtiruvchi vosita sifatida ishlaydi. Nazorat tartibida ishlashda kompyuter talabaning test savollariga bergan javoblarini hisoblab, talaba va o’qituvchi bilan teskari aloqani amalga oshirib boradi. Yo’l qo’yilgan xatoni tuzatish uchun talabani qo’shimcha axborotlar bilan ta’minlaydi va qo’yiladigan masalalarni murakkablik darajasiga ko’ra oddiydan murakkabga o’tib boruvchi ketma- ketlikda amalga oshirish imkonini beradi. Kompyuterlar - ulkan imkoniyatlarga ega bo’lib, undan mavjud ta’lim metodlarini takomillashtirish va yangi, yanada samarali metodlarni amalga oshirishda keng foydalanish mumkin. Kompyuterlar barcha turdagi ta’lim oluvchilar bilim olishini yaxshilash imkoniyatiga ega, ularni ko’plab fanlarni hamda turli ta’lim shakllarini amalga oshirishda ham qo’llash mumkin. Biroq, kompyuterlarni noo’rin yoki talab darajasidagi malakalarsiz qo’llash ta’lim tizimidagi mavjud xato metodlarni yanada chuqurlashtirishi va yangi muammolarni keltirib chiqarishi mumkin. Bu yangi, qudratli texnikadan o’z o’rnida, samarali foydalanash uchun talab darajasidagi kompyuter savodxonligiga, tegishli metod va malakalarga ega bo’lish hamda ularni yangi kompyuter dasturlariga to’g’ri bog’lay olish talab etiladi. Ijodkorlik faoliyatini tashkil etishda kompyuterlar quyidagi afzalliklarga ega: 1. Boshqarilishi muloqotli tartibda, tez va qulay amalga oshiriladi, uning texnik vositalari: displey, klaviatura, manipulyator, chiqarish qurilmalaridan foydalanish sodda tartibda amalga oshiriladi.